I AKUZUARI KUNDËRSHTON AKUZAT PËR PUNIME NDËRTIMORE TË KUNDËRLIGJSHME

Raporton: Lutfi MORINA

Prizren – Në Gjykatën Themelore në Prizren, të mërkurën,  është mbajtur shqyrtimi fillestar ndaj të akuzuarit, Salajdin Fanaj, i cili akuzohet nga prokuroria se duke bërë punime me firmën e tij, nuk ka respektuar rregullat e sigurisë.

Prokurori i çështjes, Beqë Shala, ka lexuar aktakuzën, ndërsa i akuzuari është deklaruar i pafajshëm për veprën penale me të cilën ngarkohet me aktakuzë.

Gjyqtari, Luan Berisha, ka caktuar shqyrtimin e dytë për 13 maj 2016 dhe ka njoftuar të akuzuarin dhe mbrojtësin e tij, Avni Berisha, se deri në shqyrtimin e dytë, kanë të drejtë të bëjnë kundërshtimin e provave dhe të kërkojnë hudhjen e aktakuzës.

Prokuroria Themelore në Prizren, ka ngritur aktakuzë ndaj të pandehurit, Salajdin Fanaj, të cilin e akuzon se gjatë punimeve me firmën e tij në rrugën “Nysret Sehersoj” si person përgjegjës, ka vepruar në kundërshtim me standardet profesionale dhe kushtet e lejes së ndërtimit, duke rrezikuar të tjerët, në atë mënyrë që i dëmtuari Mehmet Vezgishti, duke kaluar rrugën, ka rënë në kanalet e hapura gjatë punimeve dhe me këtë rast ka pësuar lëndime të lehta trupore.

 

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë