I AKUZUARI E NUK PRANON FAJËSINË PËR DËMTIM TË PASURISË SË HUAJ

Raporton: Verona KADRIU

Ferizaj – I pandehuri Përparim Bajrami i cili akuzohet për veprën penale “asgjësimi apo dëmtimi i pasurisë së huaj”, në shqyrtimin fillestar të mbajtur të mërkurën në Gjykatën Themelore në Ferizaj nuk pranoi fajësinë.

Pasi që i pandehuri nuk pranoi fajësinë, gjyqtari individual Mustaf Tahiri udhëzoi të njëjtin që brenda afatit ligjor prej 30 ditësh të paraqes kundërshtimet  dhe propozimet e tij lidhur me provat ose  të paraqes kërkesën për hudhjen e aktakuzës së ngritur kundër tij.

Aktakuza e ngritur nga Prokuroria Themelore në Ferizaj, akuzon të pandehurin Përparim Bajrami për veprën penale “asgjësimi apo dëmtimi i pasurisë së huaj” sepse me datë 13 prill 2014, rreth orës 17:30, në Ferizaj, pas një mosmarrëveshje që kishin pasur mes vete i pandehuri me të dëmtuarin Afrim Hoxha, i pandehuri e kishte gjuajtur me një çelës të metaltë veturën e markës “Mercedes”, pronë e të dëmtuarit, me ç’rast i gërvisht veturën në të dy dyert. Vlera e dëmit të shkaktuar sipas të dëmtuarit sillet rreth 250 euro.

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë