Gjykohen Sindikalistët e Ndërmarrjes “Jometal” dhe XIQ “Karaqevë”, për dallavere në përpilimin e listave për përfituesit e skemave pensionale

Raporton: Valdet HAJDINI

Gjilan – Ka vazhduar shqyrtimi gjyqësor kundër ish-sindikalistëve të ndërmarrjes “Jometal” dhe XIQ “Karaqevë”, Xhemail Berishës dhe Fadili Kastratit, të akuzuar për veprën penale ‘keqpërdorim i pozitës apo autoriteti zyrtar’.

Në këtë seancë të mbajtur në Gjykatën Themelore në Gjilan ka dëshmuar Refik Jakupi, i cili edhe ishte i dëmtuar në këtë rast, duke mos u përfshirë në listat e përfituesve nga skemat sociale për pensionim të parakohshëm.

Duke u përgjigjur në pyetjen e prokurori Arben Kadriu, se kur e ka fituar të drejtën nga skema sociale, dëshmitari Jakupi tha se këtë të drejtë në bazë të ligjit e ka fituar në 2006.

“Në bazë të ligjit, të drejtën për pensionim të parakohshëm e kam fituar në vitin 2006, ndërsa kjo e drejtë nga drejtuesit e sindikatës më është njohur në fund të vitit 2013 dhe këtë e gëzoi edhe sot” tha dëshmitari Jakupi.

Dëshmitari Jakupi para trupit gjykues të kryesuar nga gjyqtari Agim Ademi, deklaroj se disa herë kishte dorëzuar dokumentacionin për futje në listat e pensionimit të parakohshëm, por që drejtuesit e sindikatës, tani të akuzuarit nuk e kishin bërë një gjë të tillë.

Në pyetjen e prokurorit Kadriu se çfarë ka të bëjë sindikata me këto lista, dëshmitari tha “ata kanë pasur obligim t’i përpilojnë listat me përfitues të pensionit, ndërsa Ministria e Punës dhe Mirëqenies Sociale-MPMS i ka paguar parat”.

Në pyetjen e mbrojtësit të akuzuarit Xhemail Berisha, avokatit Ramadan Leka, se nga kush e kërkon kompensimin e dëmit, dëshmitari Jakupi tha se kompensimin e kërkon nga MPMS, por që dëmi i është shkaktuar me dëmin e të akuzuarve.

Në pyetjen e mbrojtësit të akuzuarit Fadil Kastrati, avokatit Ilmi Dalipi, për nxjerrjen e një vërtetimi në AKP, dëshmitari tha “pasi e ka dorëzuar lëndën në prokurori, së bashku me Xhemail Berishën kanë shkuar në AKP dhe e kanë nxjerr vërtetimin që ai ka të drejtë në përfitim të pensionit të parakohshëm”.

Seanca e radhës u caktua për 30 gusht 2016 në ora 9:00.

Ndryshe, proces gjyqësor zhvillohet në bazë të aktakuzës së Prokurorisë Themelore në Gjilan, e cila i akuzon Xhemail Berisha dhe Fadil Kastrati, se duke qenë përgjegjës për përpilimin dhe dorëzimin e listave të përfituesve të para-pensionit për punëtorët e ndërmarrjes “Jometal” dhe XIQ “Karaqevë” në MPMS, në mënyrë të kundërligjshme kanë përfituar të hyra nga Buxheti i Kosovës. Me veprimet e tyre, në mënyrë të kundërligjshme e kanë listuar edhe emrin e tyre në lista, në kundërshtim me Udhëzimin Administrativ për pensionim të parakohshëm. Me këto veprime, i akuzuari Xhemail Berisha ka dëmtuar Buxhetin e Kosovës dhe ka përfituar për vete shumën prej 700 eurove, ndërsa i akuzuari Fadil Kastrati ka dëmtuar Buxhetin dhe ka përfituar për vete shumën prej 1.900 eurove. Në listë dhe në mënyrë të kundërligjshme e kishin futur edhe tani të ndjerin Heset Krasniqi, përkundër faktit se i njëjti ka qenë në marrëdhënie pune, duke i mundësuar të njëjtit përfitim në shumën prej 3.200 euro.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë