GJYKOHEN PËR KORRUPSION GJASHTË ZYRTARË TË PYJEVE NGA SUHAREKA

Raporton: Diana BERISHA

Prizren  – Të mërkurën në Gjykatën Themelore në Prizren, në paraqitjen para gjyqtarit të vetëm të trupit gjykues Xheladin Osmani, u mbajt shqyrtimi dytësor ndaj personave, të cilët akuzohen për veprën penale “keqpërdorim i pozitës apo autoritetit zyrtar”.

Ky proces gjyqësor zhvillohet në bazë të aktakuzës së ngritur nga prokurorja Erheve Gashi, e cila akuzon Sedat Jeminin, Hamza Kolgecin, Hasan Buzhalën, Agim Gashin, Bashkim Gashin dhe Agim Shalën për “keqpërdorim të detyrës zyrtare”, pasi të njëjtit në cilësinë e personave përgjegjës të njësisë komunale për pylltari në Suharekë i kanë mundësuar Xhemali Destanit dhe Riza Hajdarit t’i largojnë traktorët nga vendi i ngjarjes,  të cilët ishin të ngarkuar me dru të prerë në mënyrë ilegale në bjeshkët e Fshatit Delloc. Në këtë mënyrë sipas aktakuzës të pandehurit kanë shkelur ligjin, lidhur me detyrat zyrtare me qëllim të përfitimit të dobisë për vete ose për personin tjetër.

Shqyrtimi i dytë i kësaj çështje penale u përshkua me paraqitjen e kundërshtimeve ndaj aktakuzës nga ana e mbrojtjes.

Gjyqtari Xheladin Osmani, tha se të gjitha kërkesat për hudhjen e aktakuzës dhe ligjshmërisë së provave janë refuzuar përderisa mbrojtësit e të akuzuarëve thanë se për shkak të ekonomizimit dhe mos prolongimit të kësaj çështje penale kanë vendosur që të mos paraqesin ankesë ndaj këtij aktvendimi.

Në vazhdim të gjithë mbrojtësit e të akuzuarëve deklaruan se në këtë fazë të shqyrtimit nuk posedojnë ndonjë provë tjetër por do t’a shfrytëzojnë të drejtën e rezervimit gjatë shqyrimit kryesor ku do të paraqesin propozimet e reja.

Gjykatësi Osmani tha se për shqyrtimin e ardhshëm palët do të njoftohen përmes ftesave të gjykatës.

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë