Gjykohen inspektorët e ndërtimit të Komunës së Gjakovës

Raporton: Lutfi MORINA

Gjakovë, 12 shkurt 2016 – Në Gjykatën Themelore në Gjakovë, të premtën, është mbajtur seanca gjyqësore ndaj ish inspektorëve të ndërtimit Faik Bordoniqi, Bajram Gjoshi, Ilirjana Mamusha-Luzha dhe Behar Vula, të cilët akuzohen nga prokuroria, për shpërdorim detyre në bashkëkryerje.

Sipas aktakuzës së Prokurorisë, inspektorët akuzohen se kanë shpërdoruar detyrën e tyre zyrtare, duke mos kryer detyrat e tyre sipas ligjeve në fuqi dhe detyrat e punës, duke mos i ndaluar dhe rrënuar ndërtimet pa leje, në pesë raste të ndërtimeve të larta në qytetin e Gjakovës. Të akuzuarit pretendojnë se ky rast është ngritur ndaj tyre si rezultat i ndikimeve politike dhe se nuk janë akuzuar ata që kanë qenë përgjegjës për mbikëqyrje të këtyre ndërtimeve.

Në këtë seancë është dëgjuar eksperti financiar, i cili e ka elaboruar ekspertizën e tij rreth objekteve që janë pjesë e akuzës, për të cilat tha që përveç njërës që i ka pasur dokumentet e lejes së ndërtimit të tjerat kanë pasur vetëm lejet urbanistike dhe jo ato të ndërtimit, po ashtu është ankuar se Komuna e Gjakovës nuk ka qenë bashkëpunuese me rastin e kërkesës për qasje në dokumentet e duhura për ekspertim.

Rasti është gjykuar njëherë nga kjo gjykatë me gjykim lirues, por Gjykata e Apelit e ka aprovuar ankesën e Prokurorisë dhe e ka kthyer çështjen në ri-gjykim, me arsyen se duhet të vërtetohet me prova bindëse gjendja faktike, e sidomos nëse pronarët e ndërtimeve kanë bërë apo jo pagesat për lejet e ndërtimit.

Më 28 shtator 2011, Prokuroria ka bërë propozim akuzë, ndaj të akuzuarve Faik Bordoniqi, Bajram Gjoshi, Ilirjana Mamusha-Luzha dhe Behar Vula, me të cilën i akuzon se nuk i kanë kryer detyrat e tyre si inspektorë dhe kryeinspektorë për ndalimin dhe rrënimin e nderimeve pa leje në Komunën e Gjakovës. Me këto veprime sipas organit të akuzës ata kanë kryer veprën penale, shpërdorimi i pozitës zyrtare ose i autorizimit, në bashkëkryerje. Seanca e radhës është caktuar për datën 11 mars 2016.

 

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë