Gjykimi për falsifikim të tenderit 800 mijë euro për rinovimin e objektit të PSRK-së, gjykata vendos t’i ftojë edhe dy dëshmitarë tjerë

Raporton: Nuraje BLLACA

Prishtinë – Në gjykimin ndaj të akuzuarit Tahir Sopa, përfaqësues i firmave “NBT ING SHPK” dhe “NPN Bajramaj”, i cili po akuzohet se me dokument të falsifikuar kishte fituar tender mbi 800 mijë euro për rinovimin e objektit të Prokurorisë Speciale të Republikës së Kosovës (PSRK), është vendosur se do të dëgjohen si dëshmitarë organi mbikëqyrës dhe menaxheri i projektit për këtë rast.

Ky vendim është marr në seancën e së premtes nga trupi gjykues i udhëhequr nga gjykatësi Naser Foniqi, raporton ‘‘Betimi për Drejtësi’’.

‘‘Për sqarimin e kundërthënieve në mes të pretendimeve të palës së dëmtuar dhe mendimit ndryshe të të akuzuarit, për tu sqaruar në detaje nëse tani i akuzuari gjatë punimeve ka shkatërruar dhe demoluar gjërat të cilat është dashur t’i ruaj, në cilësi të dëshmitarit do të dëgjohen organi mbikëqyrës dhe menaxheri i projektit, Artan Hajdini dhe Zenun Tolaj e që në rastin konkret kanë vepruar, të cilët do të ftohen për seancën e radhës’’, ka thënë gjykatësi Foniqi.

Ndryshe, në këtë seancë ka munguar përpiluesi i kërkesës pasurore juridike, Genc Hoxha, për të cilin përfaqësuesi i palës së dëmtuar, Këshillit Prokurorial të Kosovës, Valon Cërvadiku ka thënë se ‘‘ai tani është dekretuar gjyqtar dhe nuk e përfaqëson Këshillin Prokurorial të Kosovës’’.

Andaj në mungesë të dëshmitarëve si më lart, seanca e sotme është ndërprerë dhe e radhës është caktuar për 18 gusht 2022.

Ndryshe, më 26 nëntor 2021, trupi gjykues i udhëhequr nga gjykatësi Naser Foniqi, e kishte dërguar këtë rast në Departamentin e Përgjithshëm, por që më tutje ishte vendosur që kompetent për ta trajtuar këtë rast është Departamenti i Krimeve të Rënda.

Sipas aktakuzës së përpiluar më 27 korrik 2021, Tahir Sopa më 12 dhjetor 2019, në cilësinë e përfaqësuesit të firmave “NBT ING SHPK” dhe “NPN Bajramaj”, kishte prezantuar dokument të falsifikuar për të fituar tenderin në vlerë mbi 800 mijë euro, për rinovimin e objektit të Prokurorisë Speciale të Republikës së Kosovës.

Në aktakuzë thuhet se të dyja këto firma, përfaqësuesi i të cilave ka qenë i akuzuari Sopa kishin aplikuar në tenderin e shpallur nga autoriteti kontraktues, Këshilli Prokurorial i Kosovës (KPK) dhe se njëra nga kushtet për përmbushjen e kontratës ka qenë një deklaratë që vërteton disponueshmërinë e 200 mijë euro në llogarinë bankare, si vlerë për të siguruar tenderin.

Sipas aktakuzës, i akuzuari Sopa kishte prezantuar letër-përkrahje të lëshuar kinse nga NLB Banka për përkrahjen e kompanisë “NBT ING SHPK” për garancion bankar në vlerë 200 mijë euro, e cila letër-përkrahje ka rezultuar si e falsifikuar.

Për këto veprime, Sopa ngarkohet se me vetëdije kishte shkelur rregullat e prokurimit publik duke paraqitur dokumentacion të rrejshëm, me anë të cilit është shpallur fitues i tenderit në vlerë 811 mijë e 372 euro e 13 centë, me këtë rast i kishte shkaktar dëm buxhetit të KPK-së.

Sopa po ngarkohet me veprën penale “Keqpërdorimi dhe mashtrimi në prokurim publik”, nga neni 415, paragrafi 3, i Kodit Penal, ku kryesi dënohet me gjobë dhe me burgim prej një deri në tetë vjet. /BetimipërDrejtësi

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.

 

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë