GJYKATËSJA KËRKON TË PËRJASHTOHET NË RASTIN NDAJ INSPEKTORIT KOMUNAL

Raporton: Lutfi MORINA

Prizren- Gjyqtarja Raima Elezi, ka kërkuar nga kryetari i gjykatës në Prizren, Ymer Hoxha,  që të përjashtohet nga gjykimi në rastin e inspektorit komunal të Prizrenit, Nexhmedin Berisha, i akuzuar për keqpërdorim të informatës zyrtare. Sipas gjyqtares Elezi, kjo kërkesë është bërë pasi e njejta kishte qenë e angazhuar si gjyqtare edhe në procedurë paraprake.

Ky rast ishte në fazën e shqyrtimit të dytë, në të cilën fazë janë shtyer disa seanca. Shtyerja e tyre ishte bërë për shkakun se prokurori i çështjes, Mehdi Sefa, nuk ka prezantuar urdhëresën për përgjim ndaj të akuzuarit, e cila urdhëresë është poseduar nga Prokuroria Speciale.

Gjyqtarja në fjalë nuk ka qenë e angazhuar direkt në rastin e të akuzuarit Nexhmedin Berisha, por ky rast ka rrjedhur nga masat e fshehta të përgjimit, në një rast tjetër për krim të organizuar, i njohur si rasti “Kristal”, i cili rast përfaqësohet nga Prokuroria Speciale. Prandaj, pas sigurimit të kësaj urdhërese nga prokurori i çështjes, gjyqtarja ka vërejtur se ka marrë pjesë në procedurë paraprake, dhe në bazë të ligjeve pozitive ajo ka bërë kërkesë për përjashtimin e saj nga shqyrtimi i kësaj lënde.  Një kërkesë e tillë është pranuar nga kryetari i gjykatës, andaj rasti do të caktohet, te ndonjë gjyqtar tjetër.

Me datën 21.12.2015, Prokuroria Themelore në Prizren, ka ngritur aktakuzë ndaj të akuzuarit, Nexhmedin Berisha, të cilin e akuzon se duke qenë në detyrën zyrtare, si inspektor në Komunën e Prizrenit, ka keqpërdorur informatën zyrtare, në atë mënyrë që me telefon e ka njoftuar një palë se inspektorët së bashku me policë, ishin duke shkuar te ai, për të kontrolluar lokalin  e tij dhe për të ekzekutuar një vendim të komunës për largimin e tij nga ai lokal.

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë