Gjykatësi Valon Kurtaj ia kthen prokurores aktakuzën plotësim aktakuzën për keqpërdorim të detyrës nga dy mjekët e QKUK-së

Raporton: Adem KRASNIQI

Prishtinë – U mbajt shqyrtimi dytësor në Gjykatën Themelore në Prishtinë në rastin e dy mjekëve të QKU-së, Kushtrim e Sebahate Gashi, të akuzuar për keqpërdorim të detyrës zyrtare.

Mbrojtësit e të akuzuarve, avokatët Behar Ejupi dhe Merita Stublla, thanë se aktakuza nuk është e bazuar në fakte dhe përtej dyshimit të bazuar, dhe shtuan se qëndrojnë prapa kërkesës për hudhje të aktakuzës.

Ndryshe, prokurorja Dulina Hamiti kërkoi nga gjykata që kërkesën e palës mbrojtëse për hudhje të aktakuzës, ta refuzoj sepse e njëjta është e bazuar në prova.

Por, pas gjithë kësaj, gjyqtari i rastit Valon Kurtaj, tërhoqi vërejtjen se aktakuza duhet të precizohet dhe të plotësohet. “Akti akuzues duhet të plotësohet dhe duhet të tregohet se kush është i dëmtuari nga vepra penal keqpërdorim i pozitës zyrtare. Përshkrimi faktik i dispozitës në pikën një dhe cilësimi juridik me pikën dy dhe anasjelltas janë në shpërputhje me njëra tjetrën”, tha gjyqtari Kurtaj. Ai tutje shtoi se pasi që të bëhet plotësimi i aktakuzës, me pëlqimin e palëve procesi mundë të filloj prapë nga fillimi.

Seanca e radhës u caktua të mbahet më 11 tetor 2016, në ora 13:00.

Ky gjykim po zhvillohet në bazë të aktakuzës së Prokurorisë Themelore në Prishtinë, e cila pretendon se të mjekët e QKUK-së, Kushtrim Gashi dhe Sabahate Gashi, kanë keqpërdorur detyrën e tyre zyrtare duke vjedhur barna nga lista esenciale. Sipas prokurorisë, gjatë kontrollit nga Policia e Kosovës në shtëpinë e të akuzuarve janë gjetur pajisje mjekësore, në bazë të së cilës vërtetohet se të njëjtit pa autorizim kanë ushtruar veprimtari mjekësore. Prokuroria pretendon se këtë veprimtari të akuzuarit e kanë ushtruar në Ordinancën Specialistike “Kirurgjike Proktologjike”, duke bërë ndërhyrje tek pacientë të ndryshëm, si dhe duke i sjellë vetit përfitim pasuror të kundërligjshëm në vlerë rreth 13,992 euro.

Ndërkaq, dispozitivi i dytë ngarkon të njëjtit me veprën penale “ushtrimi i kundërligjshëm i veprimtarisë mjekësore ose farmaceutike”. Të pandehurit akuzohen se prej vitit 2001 e deri më 20 maj 2015, kanë punuar në ordinancën e tyre specialistike pa autorizim ligjor dhe pa licencë nga Ministria e Shëndetësisë. Më pas të pandehurit pretendohet se kanë vjedhur produktet medicinale, me qëllim të shitjes për pacientët e trajtuar në ordinancën e tyre. Prokuroria pretendon se produkte medicinale me banderola të Ministrisë së Shëndetësisë, janë gjetur gjatë kontrollit në ordinancën në fjalë.

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë