Gjykata vendos të mos përjashtoj avokatin Florent Latifaj nga rasti Limaj dhe të tjerët

Raporton: Adem KRASNIQI

Prishtinë – Trupi gjykues me kryetare Maria Tuma, në seancën e së mërkurës, vendosi që avokatin mbrojtës të akuzuarit, Nexhat Krasniqi, Florent Latifajn, të mos e përjashtoj nga rasti. Gjyqtarja Tuma tha se pas konsultimit të trupit gjykues dhe gjithashtu duke u bazuar në kodin e procedurës penale, ska arsye për përjashtim.

Në seancën e 13 shtatorit, prokurori i rastit, Charles Hardaway, kishte bërë kërkesë për përjashtim të avokatit Latifaj, pasi që i njëjti në të njëjtën kohë është edhe përfaqësues i Adem Grabovcit në rastin e njohur si “Pronto”, e që është propozuar si dëshmitar në këtë rast nga ana e prokurorisë.

Tutje, pala mbrojtëse e Fatmir Limajt, avokati Tahir Rrecaj, bëri vërejtje në vendimin e marrë nga Gjykata Themelore në Prishtinë, vendim i cili e kishte hedhur poshtë kërkesën që e kishte bërë avokati Karim Kan, për përjashtimin e gjyqtares Maria Tuma.

Rrecaj tha se ai vendim është marrë në bazë të një procesverbali i cili kishte pasur gabime substanciale. Por, gjyqtarja Tuma, ia ndërpreu fjalën duke thënë se ky aktvendim është i prerë dhe se askush nuk mundë të ankohet për këtë.

Gjithashtu gjatë këtij shqyrtimi, prokurori Hardaway, tha se tani kishin kuptuar, që djali i anëtarit të trupit gjykues, gjyqtarit Isuf Makolli, punon në zyrën e avokatit Florent Latifaj, i cili është mbrojtës i të akuzuarit Nexhat Krasniqi. Hardaway shtoi se, deri më tani nuk kanë ndonjë dyshim se gjyqtari Makolli ka qenë i anshëm, por që në të ardhmen, nëse dyshojnë në paanshmërinë e tij, do të bëjnë kërkesë për përjashtim të këtij gjyqtari nga ky rast.

Në aktakuzën e Prokurorisë Speciale të Republikës së  Kosovës përfshihen pesë persona të akuzuar për keqpërdorime, marrje e dhënie ryshfeti dhe vepra të  tjera, lidhur me disa tenderë që lidhen me ish Ministrinë e Transportit dhe Post Telekomit (MTPT).

Ndër ta janë ish Ministri i MTPT-së, Fatmir Limaj, ish-Drejtori i prokurimit Nexhat Krasniqi, Endrit Shala, Shpëtim Telaku dhe Florim Suka.

 

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë