Gazmend Rushiti i akuzuar për keqpërdorim të detyrës lirohet nga akuza në mungesë të provave

Raporton: Arbelina DEDUSHAJ

Prishtinë- Menaxheri i prokurimit në Qendrën Klinike Universitare, Gazmend Rushiti u lirua nga akuza për veprën penale “keqpërdorim i pozitës apo autoritetit zyrtar”.

Gjykata Themelore në Prishtinë e liroi nga akuza Rushitin, pasi nuk është provuar se i njëjti kishte kryer veprën penale për të cilën akuzohej.

Për ta dëgjuar vendimin e trupit gjykues ishte vetëm i akuzuari dhe mbrojtësi i tij avokati Hilmi Zhitia, ndërsa prokurorja e rastit Dulina Hamiti nuk u paraqit fare.

Rushiti akuzohej nga Prokuroria Themelore në Prishtinë se më 21 korrik 2014, duke shfrytëzuar pozitën e menaxherit të prokurimit në QKUK, ka nënshkruar kontratë me operatorin ekonomik N.T “Agimi-De”, i cili operator kishte ofruar çmime më të ulëta se zakonisht. Sipas aktakuzës çmimi i ulët kishte ndikuar që kjo kompani të shpallet fitues i kontratës për aktivitetin e prokurimit “Furnizim me material për shtyp” me çmim prej 9 mijë e 708 euro. I njëjti sipas prokurorisë nuk ka respektuar nenin 61 paragrafi 1 të ligjit të Prokurimit Publik, i cili e obligon Autoritetin Kontraktues të dorëzoj shpjegim dhe zbërthim detal të elementeve të tenderit.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë