Enver Hasani: Kjo aktakuzë është hakmarrje e Kryeprokurorit Aleksandër Lumezi

Raporton : Adem KRASNIQI

Prishtinë – Ish-kryetari i Gjykatës Kushtetuese Enver Hasani, i cili po akuzohet për veprat penale “shpërdorim detyre” dhe “falsifikim të dokumentit”, u deklarua i pafajshëm, duke thënë se kjo aktakuzë është hakmarrje ndaj tij.

“Kjo është hakmarrje ordinere e Kryeprokurorit të Shtetit dhe shefave të tij. Unë jam plotësisht i pafajshëm”, tha Hasani.

Kujtojmë se në seancën e kaluar të mbajtur me 15 korrik, në konsultim me avokatin Bajram Tmava, Hasani nuk ishte deklaruar rreth fajësisë apo pafajësisë së tij.

Seanca e radhës e shqyrtimit gjyqësor u caktua të mbahet më 11 tetor, në ora 09:30.

Sipas aktakuzës, më 13 nëntor 2014, Enver Hasani si Kryetar i Gjykatës Kushtetuese të Kosovës, rreth vazhdimit të mandatit të tre gjyqtarëve ndërkombëtar, kishte nxjerrë një aktvendim nga i cili kishin përfituar mandate shtesë të kundërligjshme si gjyqtar ndërkombëtar në Gjykatën Kushtetuese të Kosovës gjyqtarët Robert Carolan, Almiro Rodriguez dhe Snezhana Botusharova.

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë