E AKUZUARA NUK MERR FTESË NGA GJYKATA, SHTYHET SEANCA PËR KORRUPSION

Raporton: Arbelina DEDUSHAJ

Prishtinë – Ftesa e pa dorëzuar në adresën e saktë të së akuzuarës Arbresha Hoti u bë shkas që seanca e së enjtes të shtyhet. Ky proces gjyqësor kundër Hotit, e cila akuzohet për veprën penale “përvetësimi gjatë ushtrimit të detyrës”, ishte shtyrë disa herë për arsye të ndryshme.

Pas një pritje të gjatë në hollin e Gjykatës Themelore në Prishtinë, mbrojtësi i të akuzuarës Hoti, avokati Ramë Gashi si dhe përfaqësuesi i palës së dëmtuar nga kompania “IPKO”, Blerim Halimi u larguan, pasi këta të fundit as që ishin njoftuar paraprakisht për një vonesë të tillë nga ana e gjykatëses Syzana Qerkini. Qerkini këtë vonesë e kishte arsyetuar me faktin se kishte qenë kryetare e trupit gjykues në një rast tjetër në një seancë të paradites, e cila kishte zgjatur më shumë se sa ishte paraparë.

Sipas aktakuzës së ngritur më 20 dhjetor 2011 nga prokurorja Drita Hajdari, tani e përfaqësuar nga Ferdane Sylejmani, e pandehura Hoti në cilësinë e personit zyrtarë, përkatësisht udhëheqëse e ekipit në kompaninë “IPKO”, me seli në Prishtinë, “Qyteza Pejton”, nuk e kishte kryer obligimin e saj që të hollat e pazarit të asaj pike të shitjes t’i deponojë në “Procredit Bank”, por të njëjta i kishte përvetësuar e atë në shumën prej 31.622,34 eurosh.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë