Drejt fundit gjykimi ndaj zyrtarëve të KEDS-it për marrje ryshfeti

Raporton: Valdet HAJDINI

Prishtinë – Para trupit gjykues të udhëhequr nga gjyqtarja Shadije Gërguri, ka vazhduar gjykimi ndaj zyrtarëve të KEDS-it, Muharrem Havolli, Halim Asllani, Ilir Hajdini dhe Fatmir Medeci, që të gjithë të akuzuar për veprën penale ‘marrje e ryshfetit’.

Nga seanca e kaluar kishte mbetur të vazhdoi me mbrojtjen e vet i akuzuari Fatmir Medeci, i cili deklaroi se në ditën kur është ndaluar nga policia, i janë konfiskuar gjësendet individuale. “Atë ditë më është konfiskuar edhe kuleta, në të cilën kam pasur 700 euro nga shitja e veturës”, tha i akuzuari Medeci.

Pas përfundimit të mbrojtjes nga i akzuauri Medevci, seanca vazhdoi me fjalët përfundimtare të palëve.

Prokurorja e shtetit Merrushe Llugiqi deklaroi se pas seancave gjyqësore, administrimit të provave dhe dëgjimit të dëshmitarëve, është vërtetuar se të akuzuarit me veprimet e tyre kanë kryer veprën penale si në aktakuzë. Prokurorja Llugiqi kërkoi nga trupi gjykues që gjatë marrjes së vendimit, të akuzuarit t’i shpallë fajtor dhe t’i dënoi sipas ligjit.

Mbrojtësi i të akuzuarit Muharrem Havolli, avokati Behar Ejupi deklaroi se prokuroria nuk ka siguruar prova bindëse, për të dëshmuar kryerjen e veprimeve të kundërligjshme nga i mbrojturi i tij.

Mbrojtësi i të akuzuarit Halim Asllani, avokati Afrim Salihu deklaroi se edhe pas shtjellimit të provave dhe dëgjimit të dëshmitarëve, nuk janë vërtetuar pretendimet e prokurores për kryerjen e veprës penale si në aktakuzë.

Mbrojtësi i të akuzuarit Ilir Hajdini, avokati Arsim Bilalli deklaroi se prokuroria nuk ka arritur të vërtetoi kryerjen e veprës penale, ndërsa në mungesë të provave trupi gjykues të marr aktgjykim lirues.

Mbrojtësi i të akuzuarit Fatmir Medeci, avokati Ali Latifi në fjalën përfundimtare deklaroi se prokuroria nuk ka ofruar prova të mjaftueshme për kryerjen e veprës penale, duke kërkuar nga trupi gjykues që të marr aktgjykim lirues.

Shpallja e aktgjykimit për këtë rast do të shpallet me 14 shtator 2016, në ora 13.00.

Ky rast po zhvillohet në bazë të aktakuzës së Prokurorisë Themelore në Prishtinë, e cila ngarkon Muharrem Havolli, Halim Asllani, Ilir Hajdini dhe Fatmir Medeci me veprën penale ‘marrje e ryshfetit’. Sipas pretendimit të prokurorisë, të akuzuarit ngarkohen se në cilësinë e personave zyrtar si kontrollues në shërbimin e humbjeve komerciale në KEDS, kanë kërkuar shumën prej 600 eurove nga i dëmtuari Liman Alshiqi, me arsyetimin e ndërrimit të njehsorit elektrik.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë