DREJT FUNDIT GJYKIMI I POLICIT QË AKUZOHET PËR KEQPËRDORIM PËR SHKAK TË MUNDËSIMIT TË KONTRABANDËS

Raporton: Syzana REXHEPI

Gjilan – Në Gjykatën Themelore në Gjilan, të mërkurën, ka përfunduar shqyrtimi gjyqësor ndaj të akuzuarit Xhevahir Gjymshiti, zyrtar policor, i cili akuzohet nga Prokuroria se ka shpërdorur pozitën zyrtare .

Prokurori i rastit Afrim Shefkiu, në fjalën përfundimtare tha se nga seancat e mbajtura në këtë shqyrtim gjyqësor, nga provat materiale dhe dëgjimi i dëshmitarëve, është vërtetuar se i akuzuari Xhevahir Gjymshiti, duke e kryer detyrën e tij, si zyrtar policor, ka keqpërdorur pozitën zyrtare, duke i mundësuar kontrabanduesve që të kontrabandojnë mallra  nga territori i Maqedonisë në territorin e Kosovës, andaj ka kërkuar që i njëjti të shpallet fajtor dhe të dënohet sipas ligjit.

Mbrojtësi i të akuzuarit Xhevahir Gjymshiti, avokati Ekrem Pira, në fjalën përfundimtare ka deklaruar se gjatë shqyrtimit gjyqësor, me administrimin e provave materiale, nuk është vërtetuar fajësia e të mbrojturit të tij andaj ka kërkuar që të shpallet i pafajshëm për akuzën me të cilën ngarkohet.

Kryetari i trupit gjykues, Agim Ademi, e ka shpallur të përfunduar këtë shqyrtim gjyqësor dhe shpalljen e aktgjykimit e ka caktuar për 8 korrik 2016, në ora 15:00.

Sipas Prokurorisë, i pandehuri Xhevahir Gjymshiti, si polic në Policinë e Kosovës, lindje-Kaçanik, Vija e Gjelbër, duke shfrytëzuar detyrën apo autoritetin zyrtar i ka tejkaluar kompetencat zyrtare në atë mënyrë që me qëllim që vetes apo tjetrit t’i sjell dobi të kundërligjshme pasurore për gjatë vijës kufitare Debellde-Stançiç në më mënyrë të vazhdueshme u ka ndihmuar kontrabanduesve të mallrave që të kontrabandojnë mallra nga territori i Maqedonisë për në Kosovë, duke qenë në kontakt të vazhdueshëm në celular me ata ashtu që edhe pas implementimit të masave të fshehta të hetimit dhe vëzhgimit hetohet dhe zbulohet.

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë