Dështon të mbahet shqyrtimi gjyqësor ndaj ish-inspektorit të ndërtimit në Prizren

image0
Author

Raporton: Liridon PNISHI

Korrik 16, 2020

Prizren – Ka dështuar të mbahet seanca gjyqësore ndaj ish-inspektorit të ndërtimit në Komunën e Prizrenit, Nexhmedin Musliu, i akuzuar për keqpërdorim detyre.

Shkak për mos mbajtjen e seancës së paraparë për të enjten, në Gjykatën Themelore në Prizren, ishte mungesa e të akuzuarit Musliu dhe mbrojtësve të tij, Blend dhe Gent Gjini, raporton “Betimi për Drejtësi”

Kryetarja e trupit gjykues, Raima Elezi bëri të ditur se i akuzuari dhe avokatët e tij nuk e kanë arsyetuar mungesën e tyre, edhe pse tha se janë ftuar në mënyrë të rregullt.

Prezent në sallë të gjykimit ishte prokurorja Ervehe Gashi, e cila propozoi që të zbatohet ligji, për sigurimin e prezencës së të akuzuarit.

Në këto rrethana, shqyrtimi i radhës u caktua të mbahet më 18 shtator 2020 në ora 09:00, ku për atë seancë, gjykatësja Elezi tha se për të akuzuarin do të lëshohet urdhëresë për sjellje në gjykatë.

Ndryshe, në aktakuzën e Prokurorisë Themelore Prizren të ngritur më 25 shtator 2019, i pandehuri Nexhmedin Musliu akuzohet për veprën penale të keqpërdorimit të pozitës apo autoritetit zyrtar.

Ai akuzohet se prej datës 21 nëntor 2016 e në vazhdim në Prizren, në cilësinë e personit zyrtar si inspektor komunal i ndërtimit, duke shfrytëzuar detyrën zyrtare apo autoritetin zyrtar, nuk i përmbush detyrat zyrtare të tij me qëllim të përfitimit të dobisë për tjetrin.

Në aktakuzë thuhet se i akuzuari nuk e inspekton dhe nuk ndërmerr veprime kundër mbindërtimit pa leje të bërë nga investitori Mehmet Palushi, i cili duke ndërtuar objektin e tij ka tejkaluar lejen për një etazhitet, leje kjo e lëshuar nga Drejtoria për Urbanizëm dhe Planifikim Hapësinor në Komunën e Prizrenit.

Sipas aktakuzës, i akuzuari Musliu, duke mos ndërmarr veprime i ka mundësuar Mehmet Palushit ndërtimin edhe të një kati dhe mos pagesën e taksave komunale, ndërsa Kuvendit Komunal i ka shkaktuar dëm në vlerën e taksave të papaguara dhe ka dëmtuar infrastrukturën e qytetit në zonën e ndërtimit “Qylhan”.

Me këtë, ai akuzohet se ka kryer veprën penale “keqpërdorim i detyrës apo autoritetit zyrtar”. /BetimipërDrejtësi