Dështon gjykimi në rastin ku paditësja kërkon t’i njihet e drejta e pensionit për persona me aftësi të kufizuar

Raporton: Valentina SHAHINI – GRAJҪEVCI

Prishtinë – Të mërkurën, në Gjykatën Themelore në Prishtinë ka dështuar të mbahet gjykimi në rastin ku paditësja H.K. po kërkon që të anulohet vendimi i Ministria e Punës dhe Mirëqenies Social (MPMS)dhe t’i njihet e drejta e pensionit për persona me aftësi të kufizuar.

Me vendim MPMS, paditëses ia ka refuzuar kërkesën për njohjen e të drejtës për pension për personat me aftësi të kufizuar me arsyetimin se nuk janë ofruar dëshmi të mjaftueshme për të qenë shfrytëzues i pensionit me pa aftësi të përhershme.

Deri te dështimi i seancës ka ardhur pasi që përfaqësuesi i paditëses, avokati Fisnik Sogojeva ka thënë se ka qenë e pamundur me të komunikoj me palën paditëse për ta realizuar ekspertizën mjekësore.

Andaj, mbi këtë bazë ai ka kërkuar nga gjykata që të shtyhet seanca, në mënyrë që i njëjti ta gjej një formë për të kontaktuar me palën paditëse.

Pas kësaj, gjykatësja e rastit Luljeta Maxhuni e ka aprovuar kërkesën e palës paditëse dhe seancën e ka shtyrë deri më 7 qershor 2022.

Sipas padisë të ushtruar më 21 shkurt 2017 thuhet se Gjykata Themelore në Prishtinë, Departamenti për Çështje Administrative kërkesën e paditëses e kishte aprovuar dhe lëndën e kishte kthyer në rishqyrtim te tani e paditura.

Por siç thuhet e paditura për kundër vërejtjeve të gjykatës, kishte nxjerrë aktvendim identik me atë për të cilën gjykata veço se kishte vendosur.

Siç thuhet në padi, paditësja i plotëson të gjitha kushtet për pension për persona me aftësi të kufizuar.

Prandaj ajo kërkon nga gjykata që të anulohet vendimi i MPMS dhe ti njihet e drejta për këtë pension./BetimipërDrejtësi

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë