DËSHMITARI: SHLEVA KREDINË PARA KOHE, PARATË I MORI I AKUZUARI MARMULLAKU

Raporton: Valdet HAJDINI

Pejë –  Fazli Berisha ka dëshmuar të martën në Gjykatën Themelore në Prizren, në shqyrtimin gjyqësor kundër Rasim Marmulakut, i akuzuar për përvetësim gjatë ushtrimit të detyrës. Berisha tha se kishte menduar se e kishte kthyer kredinë prej mija eurosh nga Kreditimi Rural i Kosovës. Mirëpo, dy vite pasi e kishte shlyer borxhin ishte thirrur nga zyrtarët e Kreditimit për të kthyer obligimin. Përgjegjësi për të shlyer borxhin, në kohën kur kishte kthyer kredinë, sipas tij, kishte qenë Rasim Marmullaku.

“Pas kësaj i kam telefonuar Rasim Marmullakut, i cili më ka thënë se kredia është mbyllur dhe se unë jam dëshmitar i mbylljes”, tha dëshmitari Berisha, në seancën e kryesuar nga gjyqtarja Lumturije Muhaxheri.

Dëshmia e Berishës është dhënë pasi këtë e ka kërkuar prokurorja Sahide Gashi e cila udhëheq aktakuzën ndaj Marmullakut.

Duke u përgjigjur në pyetjen e të akuzuarit, nëse ka pasur probleme me kreditë e marra, dëshmitari Berisha ka thënë se asnjëherë s’ka pasur probleme me kredi pavarësisht se kishte marrë edhe herëve të tjera hua prej bankave.

Seanca e radhës për këtë rast është caktuar më 21 korrik të këtij viti.

Ndryshe, Prokuroria pretendon se i pandehuri Rasim Marmullaku, kishte keqpërdorur 1.359,55  euro. Sipas aktakuzës, ai këto mjete i kishte marrë prej Fazli Berishës dhe të njëjtat s’i kishte dërguar në vendin për çka ishin dhënë.

Kjo ngjarje kishte ndodhur në dhjetor të vitit 2011.

 

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë