DËNOHET ME NJË VIT BURGIM PËR FALSIFIKIM ZYRTARI I DREJTORISË SË ARSIMIT NË PRIZREN

Raporton: Lutfi MORINA

Prizren – Reshit Kushaj zyrtar për arsim i Drejtorisë Komunale të Arsimit në Prizren, është dënuar me një vit burgim efektiv për falsifikim të dokumentit zyrtar, përmes të cilit kishte pretenduar t’ia mundësonte vazhdimin e shkollimit një nxënësi. Krahas këtij dënimi Kushaj obligohet të paguaj edhe 300 euro taksë gjyqësore për shpenzimet e procedurës penale.

Kryetarja e trupit gjykues, Ajser Skenderi, të premten, në Gjykatën Themelore në Prizren, ka shpallur verdiktin e trupit gjykues, sipas të cilit, i akuzuari është fajtor për veprën penale të falsifikimit të dokumentit zyrtar.

Prokurori i rastit, Sefer Morina, me aktakuzë, e ngarkonte të pandehurin se kishte falsifikuar një diplomë të Shkollës së Mesme për nxënësin Bledar Krasniqi, duke dashur t’ia mundësojë të njëjtit vazhdimin e shkollimit në klasë të 12-të, megjithëse ai kishte përsëritur klasën e 11-të.

Të premten ka filluar dhe përfunduar gjykimi, në të cilin ka dëshmuar pikërisht Bledar Krasniqi, i cili ka thënë se pasi që kishte përsëritur klasën e 11-të, kishte shkuar në zyrën e të pandehurit dhe i kishte kërkuar ndihmë, ndërsa më vonë kishte pranuar një diplomë nga i akuzuari, në të cilën notat ishin kaluese.

Dëshmitari më tej ka shtuar se pasi i kishte treguar prindit të tij atë diplomë, prindi nuk kishte pranuar që një diplomë e tillë të shfrytëzohej nga dëshmitari, për të vazhduar shkollimin, andaj e kishte shqyer dhe e kishte hedhur në lumin “Lumbardh”.

Në anën tjetër i akuzuar ka mohuar akuzën duke thënë se po të donte që t’i ndihmonte dëshmitarit, do të thërriste profesorët dhe do t’u thoshte t’i vendosnin notë kaluese e nuk do të hynte në këto probleme.

Tutje ai ka shtuar se kjo aktakuzë është e ngritur nën ndikimin e politikës, duke shtuar se në asnjë fazë të procedurës, as në polici e as në prokurori nuk i është ofruar dëftesa origjinale me notat kaluese, për të cilën ai dyshohet se e ka përpiluar në mënyrë të paligjshme.

I akuzuari në fjalën e tij përfundimtare duke u ndërlidhur me deklaratën e dëshmitarit, i cili tha se dëftesën origjinale, babi i tij e kishte shqyer dhe e kishte hedhur në lum, ka ngritur dyshime ndaj policisë dhe prokurorisë dhe forenzikës, se si është bërë fotokopje një diplomë e shqyer, në bazë të së cilës fotokopje edhe aktakuza është ngritur.

Prokuroria Themelore në Prizren, në fund të vitit 2015 kishte ngritur aktakuzë ndaj të akuzuarit, Reshit Kushaj, të cilin e akuzon se duke qenë zyrtar i arsimit në Drejtorinë Komunale të Arsmit në Prizren, ka falsifikuar dokumentin zyrtarë, në atë mënyrë që, ka përpiluar, vërtetuar dhe nënshkruar dëftesën e shkollës së mesme për nxënësin Bledar Gashi.

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë