Bordi merr vendim për shpalljen e konkursit të ri për drejtor të përgjithshëm të RTK-së

Raporton: “Betimi për Drejtësi”

Prishtinë- Bordi i Radio Televizionit të Kosovës (RTK), në mbledhjen e mbajtur më 17 maj, ka marrë vendim të shpall konkurs të ri për drejtor të përgjithshëm të RTK-së.

Lajmi u bë i ditur përmes një komunikate për medie nga ky Bord, ku thuhet se i njëjti ka autorizuar administratën e RTK-së që ta shpallë konkursin më 23 maj 2022, raporton “Betimi për Drejtësi“.

Po ashtu, në këtë mbledhje, Bordi paraprakisht aprovoi rregulloren për procedurat e përzgjedhjes së Drejtorit të Përgjithshëm dhe Menaxhmentit të lartë të RTK-së.

Në komunikatë thuhet se rregullorja përmban gjithsej 26 nene duke rregulluar dhe përcaktuar procedurat, kriteret, kushtet e veçanta, procedurat e vlerësimit dhe ato të intervistimit të anëtarëve të menaxhmentit të lartë nisur nga drejtori i përgjithshëm i transmetuesit publik.

“Si i tillë, ky dokument është hartuar nga një grup punues brenda RTK-së i krijuar për këtë qëllim dhe është shqyrtuar në disa takime nga Bordi i RTK-së. Gjithashtu, rregullorja iu është dërguar për komente shtesë palëve të interesit si sindikatave të RTK-së dhe organizatave të shoqërisë civile të cilat e monitorojnë punën e bordit. Gjatë procedurës së shqyrtimit të rregullores, Bordi i RTK-së ka pranuar komente nga Lëvizja FOL dhe nga Zyra e përfaqësuesit special të BE-së në Kosovë, të cilat i ka shqyrtuar dhe disa nga komentet i ka përfshirë në rregullore në prani edhe të organizatave monitoruese”, thuhet në komunikatë.

Vendimi për shpalljen e konkursit për drejtor të përgjithshëm të RTK-së, u mor pas miratimit të Rregullores për Procedurat e Përzgjedhjes së Drejtorit të Përgjithshëm dhe Menaxhmentit të lartë të RTK-së. /BetimipërDrejtësi

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë