Boban Bogdanoviq i akuzuar për keqpërdorim të pozitës zyrtare deklarohet i pafajshëm

Raporton : Syzana REXHEPI

Gjilan – Zyrtari për furnizim të mallit sanitar në Komunën e Kllokotit, Boban Bogdanoviq, i akuzuar për veprën penale “keqpërdorim i pozitës apo autoritetit zyrtar” është deklaruar i pafajshëm në seancën e mbajtur të mërkurën në Gjykatën Themelore në Gjilan.

Në këtë seancë janë marrë në pyetje dëshmitarët Sasha Mirkoviq dhe Marko Sfiloanoviq. Ndërsa mungoi përfaqësuesi i Komunës së Kllokotit edhe pse ishte ftuar me ftesë të rregullt.

Dëshmitari Sasha Mirkoviq tha se në vitin 2013 kishte qenë Kryetar i Komunës së Kllokotit dhe për pranimin e mallrave kishte qenë i caktuar Boban Bogdanoviq dhe disa persona tjerë. Mirkoviq tha se malli që kishte ardhur në Komunë është shpërndarë dhe nuk beson që ka pasur keqpërdorim nga ana e Bogdanoviq, por theksoi se të gjitha këto akuza ndaj tij janë për shkaqe politike. Ai tha se edhe dorëzuesi i mallit edhe pranuesi kanë pasur për obligim që të nënshkruajnë.

Ndërsa dëshmitari Marko Sfiloanoviq tha se gjatë kohës sa kishte qenë nënkryetar i Komunës së Kllokotit nuk ishte iniciuar asnjë procedurë disiplinore ndaj Bogdanoviqit. Ai tha se di që ka qenë i ndershëm në punën që e ka bërë dhe nuk beson se ka keqpërdorur punën e tij.

Seanca e radhës u caktuar për 18 tetor 2016 në ora 13:00.

Ky proces gjyqësor zhvillohet në bazë të aktakuzës së ngritur nga prokurori Arben Kadriu, i cili akuzon Boban Bogdanoviq, zyrtar për furnizim të mallit sanitar në Komunën e Kllokotit për keqpërdorim të pozitës zyrtare. Sipas aktakuzës, Bogdanoviq gjatë periudhës së vitit 2013, duke e shfrytëzuar detyrën zyrtare me qëllim të përfitimit të çfarëdo dobie për vete ose për personin tjetër, nuk i kishte kryer detyrat për të cilat kishte qenë i detyruar. Ai kishte pranuar mallin nga kontraktuesi NTP “Ermali Com” dhe obligimin që të njëjtën dërgesë ta autorizojë për në destinacionin e caktuar, Bogdanoviq nuk posedon mbulesë se ku i ka dërguar mallërat të pranuara sipas fletë dërgesave në vlerë prej 5.013.00, dëm ky i shkaktuar Komunës së Kllokotit

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë