Avokati mbrojtës kërkon shkresat e lëndës, shtyhet seanca për të akuzuarin për keqpërdorim të detyrës zyrtare, Hamdi Tërbeza

Raporton: Adem KRASNIQI

Prishtinë – Seanca e paraparë të mbahet të martën në Gjykatën Themelore në Prishtinë ndaj zyrtarit në Stafin Civil të Drejtorisë së Logjistikës të Policisë së Kosovës, Hamdi Tërbeza, i akuzuar për keqpërdorim të pozitës zyrtare, u shty sepse avokati mbrojtës Durim Osmani, nuk ishte pajisur me shkresat e lëndës.

Avokati Osmani tha se të martën e kishte marrë autorizimin nga i akuzuari Tërbeza për përfaqësimin e tij, dhe si pasojë nuk i ka shkresat e lëndës. Prandaj ai kërkoi nga trupi gjykues, që seanca të shtyhet për një datë tjetër derisa ai të pajiset me shkresat e lëndës dhe të përgatitë mbrojtjen e klientit të tij.

Pas konsultimit me trupin gjykues dhe me prokurorin Feti Tunuzliu, kryetarja e trupit gjykues Valbona Musliu Selimaj, mori aktvendim që seanca të shtyhet për 28 shtator 2016, në ora 10:30.

Sipas aktakuzës, Hamdi Tërbeza si zyrtarë në Stafin civil të Drejtorisë së Logjistikës të Policisë së Republikës së Kosovës, me qëllim që vëllai i tij Artan Tërbeza ta jap provimin për patentë shofer për kategorinë “B”, duke mos iu nënshtruar fare testit, e kishte kërcënuar përmes një sms-i Kasim Hoxhën, instruktor në auto-shkollën “Anita” në Prishtinë. Gjithnjë sipas aktakuzës, Tërbeza e kishte kërcënuar instruktorin Kasim Hoxha, që i njëjti ta kryej testin me shkrim në emër të vëllait të tij, Artan Tërbezës, përndryshe do të shkoj të marrë komandantin e te kthehet me të, duke i thënë se ia kishte përgatitur vendin që ta lidhë e ta detyrojë për t’ia kryer testin.

 

 

 

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë