AVOKATI INJORON PROKURORIN PARA GJYKATËS: “HIQMU TIJ PASHË ZOTIN”

Raporton: Hyrije MEHMETI

Prishtinë – Mbrojtësi i të akuzuarit Menderes Sinani, avokati Aziz Rexha, ka reaguar në disa pyetje të prokurorit Drew Engel, të parashtruara për klientin e tij. Gjatë kohës kur ky i fundit e ka pyetur të akuzuarin lidhur me familjen e tij, avokati Rexha i është drejtuar trupit gjykues me fjalët ”Hiqmu tij pashë Zotin”. I njëjti  ka ndërhyrë duke thënë se nuk duan të përgjigjen në pyetjet që kanë të bëjnë me familjen e Sinanit: “Që ka nevojë zotëria le të tregoj për familjen e vet” tha ai. Lidhur me këtë, kryetari i trupit gjykues, Piotr Bojarchuk, ka kërkuar që të kalohet në pyetjet e rradhës.

Mirëpo kjo nuk ishte hera e vetme kur i akuzuari Sinani dhe mbrojtësi i tij kanë kundërshtuar pyetjet e prokurorit Engel. Gjatë kohës kur ky i fundit e ka pyetur disa herë të akuzuarin nëse ka pasur ndonjë konspiracion mes Arben Sylejmanit, Besim Shabanit dhe Xhemshir Beqirajt, Sinani është përgjigjur me fjalët “Nuk jam analist i konspiracionit, nuk muj me ditë. Turp është me më ba mu këso pyetje”. Në këtë rast, gjyqtari Bojarchuk reagon duke thënë se për vlerësimin e cilësisë së pyetjeve të bëra nga prokurori vendos vet trupi gjykues.

Gjatë dhënies së deklaratës së tij, i akuzuari Sinani është pyetur përsëri lidhur me takimin e tij me anëtarët e familjes Sylejmani, në këtë rast me të lartpërmendurit Arben Sylejmani dhe Xhemshir Beqiraj. Madje i njëjti ka bërë të ditur edhe një herë detajet nga takimi i tij me Xhemshir Beqiraj dhe Besim Shabanin në lokalin e quajtur “Euromiti”. Mirëpo, pasi prokurori e ballafaqon atë me një pjesë të deklaratës së dhënë në vitin 2013 lidhur me këtë rast, i njejti thotë se nga ai moment nuk dëshiron të përgjigjet më në asnjë pyetje. Kjo pasi sipas Sinanit, prokurori vazhdimisht po bën pyetje të njejta por në variante të ndryshme, e për të cilat është përgjigjur disa herë. Prokurori Engel është kundërpërgjigjur me fjalët “Mund ta mbash gjuhën, por unë do të vazhdoj të parashtroj pyetje”.  Mirëpo, kryetari i trupit gjykues e refuzon vendimin e të akuzuarit Sinani për të mos u përgjigjur, pasi sipas tij ndërrimi i strategjisë në këtë fazë është i papranueshëm.

Megjithatë, për shkak të përfundimit të orarit të punës në Gjykatën Themelore në Prishtinës, është ndërprerë marrja në pyetje e të akuzuarit Menderes Sinani.

Para se të gjithë të largoheshin nga salla, avokati Aziz Rexha, parashtroi përsëri kërkesë më shkrim për heqjen e masës së arrestit shtëpiak për të mbrojturin e tij Menderes Sinani. “Qëndrimi që 3 vjet nën masa të sigurisë, konsideroj se është dënim i vërtetë. Jo paraburgim, po dënim apriori para kohe”, tha ai.  Sipas tij, kjo kërkesë bazohet në nenin 185 të Kodit të Procedurës Penale, përkatësisht paragrafi 3, ku thuhet se “Paraburgimi hiqet dhe i paraburgosuri lirohet në çdo fazë të procedurës posa të pushojnë shkaqet e caktimit të tij”. Këtë kërkesë e kundërshtuan prokurori Drew Engel, i dëmtuari Bidajet Sylejmani dhe mbrojtësi i tij, avokati Bekim Sylejmani. Mirëpo, vendimi lidhur me këtë çështje do të merret pasi kërkesa të shyqrtohet nga anëtarët e trupit gjykues, për të cilën gjë palët do të njoftohen me shkrim.

Seanca e rradhës u caktua të mbahet më 2 gusht 2016, në ora 09:30.

Prokuroria Speciale e Republikës së Kosovës e ngarkon të akuzuarin, ish-togerin Menderes Sinani për veprat penale penale “shpërdorim i pozitës zyrtare”, “marrje e ryshfetit”, “ushtrim i ndikimit”, “shmangie nga pagesa e taksave të detyrueshme doganore”, “dhënie e ndihmës kryesve, pas kryerjes së veprës penale”, ”moslajmërim i veprave penale apo kryesve të tyre”, dhe “mbajtje në pronësi, kontroll ose posedim i paautorizuar i armëve”. Në këtë proces gjyqësor, të akuzuar janë edhe 6 persona tjerë: Besim Shabani, Burim Veseli, Sami Matoshi, Ramadan Ajvazi, Agron Matoshi dhe Vahid Tahiri.

 

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë