Anëtarja e trupit gjykues e angazhuar në KGJK, dështon gjykimi për vrasje në tentativë

Raporton: Valentina SHAHINI – GRAJҪEVCI

Prishtinë – Në mungesë të anëtares së trupit gjykues Shpresa Hasaj-Hyseni, e cila është e angazhuar në Këshillin Gjyqësor të Kosovës (KGJK), ka dështuar të mbahet seanca e së hënës, në rastin ku Ilir Shala po akuzohet për vrasje në tentativë.

Lidhur me mungesën e anëtares së trupit gjykues Hasaj-Hyseni, kryetari i trupit gjykues Alban Ajvazi ka thënë se e njëjta e ka njoftuar gjykatën se për shkak të angazhimit në KGJK nuk mund të jetë e pranishme në gjykim, raporton “Betimi për Drejtësi”.

Po ashtu në këtë seancë ka munguar edhe prokurorja e rastit Besa Limani, për të cilën gjykatësi Ajvazi ka thënë se e njëjta ka qenë e ftuar në mënyrë të rregullt, por nuk është paraqitur në gjykim dhe mungesën nuk e ka arsyetuar.

Andaj mbi këto rrethana, gjykatësi Ajvazi seancën e ka shtyrë për 9 shtator 2022.

Ndryshe, sipas aktakuzës së ngritur nga Prokuroria Themelore 30 prill 2014, thuhet se në rrugën “Shalë”, Komuna e Lipjanit, deri sa i dëmtuari Faton Shala ka qenë duke ecur në rrugë, tani i akuzuari Ilir Shala me dashje që ta privoj nga jeta, për shkak të një zënke që kishin pasur para disa ditëve tani i akuzuari ë kishte ndjekur me veturën e tipit “Audi”.

Tutje thuhet se pasi që i dëmtuari e kishte dëgjuar zhurmën e veturës kishte ikur në trotuar, mirëpo pas kësaj tani i akuzuari  kishte goditur në këmbën e djathtë, me pjesën e përparme të veturës së tij, dhe pastaj ka ikur nga vendi i ngjarjes.

Me këto veprime akuzohet se ka kryer veprën penale “vrasje në tentativë”, nga neni 146 lidhur me nenin 20 të KPK-së./BetimipërDrejtësi

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë