Aktakuzë ndaj asamblistit të LDK-së në Kamenicë, nuk e deklaroi biznesin e djalit të tij

Raporton: Blerim JAKUPI

Kamenicë – Prokuroria Themelore në Gjilan, ka ngritur aktakuzë ndaj asamblistit të Lidhjes Demokratike të Kosovës (LDK) në Komunën e Kamenicës, Sejdi Kurteshi, i cili ngarkohet se nuk deklaroi biznesin e djalit të tij në deklarimin vjetor të pasurisë.

Aktakuza është ngritur më 16 maj të këtij viti, të cilën e ka siguruar “Betimi për Drejtësi”, ku pretendohet se i akuzuari nuk e ka deklaruar biznesin e djalit të tij T.K., “Kashmiri” Sh.P.K.

Kjo aktakuzë është dorëzuar në Gjykatën Themelore në Gjilan, dega në Kamenicë, për të cilin rast ende nuk është caktuar shqyrtimi fillestar, raporton “Betimi për Drejtësi”.

Prokuroria Themelore në Gjilan, më 16 maj 2022, ka ngritur aktakuzë ndaj Sejdi Kurteshit, me arsyetimin se ai nga 1 deri më 31 mars 2021, në cilësinë e Këshilltarit të Asamblesë Komunale në Kamenicë, ka qenë i detyruar ta bëjë deklarimin e pasurisë për vitin 2020, mirëpo i njëjti këtë nuk e ka bërë.

Sipas prokurorisë, Kurteshi nuk i ka paraqitur të dhënat e sakta, duke mos shënuar në formularin e deklarimit të pasurisë biznesin e djalit të tij T.K., “Kashmiri” Sh.P.K., i vërtetuar nga Agjencia e Regjistrimit të Bizneseve në Kosovë (ARBK) dhe Administrata Tatimore e Kosovës (ATK).

Me këtë, Sejdi Kurteshi po akuzohet se ka kryer veprën penale “Mos raportimi ose raportimi i rremë i pasurisë, i të ardhurave, i dhuratave, i dobisë tjetër materiale ose detyrimeve financiare”, nga neni 430 paragrafi 2 të Kodit Penal, vepër kjo e dënueshme me burgim prej gjashtë muaj deri në pesë vjet. /BetimipërDrejtësi

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë