Afër fundit gjykimi ndaj Kryetarit të Komunës së Kllokotit, për dallaveret në punësimin e shërbyesve civil

Raporton: Valdet HAJDINI

Gjilan – Në seancën e së hënës kundër Srećko Spasić, Kryetar i Komunës së Kllokotit, i akuzuar për veprën penale ‘keqpërdorim i pozitës apo autoritetit zyrtar’ janë lexuar dhe administruar të gjitha provat materiale, shkresat e lëndës të bashkangjitura në aktakuze, provat e propozuara nga mbrojtja, si dhe ato të propozuara nga palët e dëmtuara. Në lidhje me provat e administruara në këtë seancë, palët nuk patën vërejtje, për faktin se shumica prej tyre ishin dokumente zyrtare, të lëshuara a institucionet shtetërorë.

Pas leximit dhe administrimit të provave, kryetari i trupit gjykues Afrim Shala, i njoftoi palët se në seancën e ardhshme i akuzuari do të jap mbrojtjen e tij, si dhe do të jepen fjalët përfundimtare.

Seanca e ardhshme për këtë rast gjyqësor u caktua për 24 tetor 2016, me fillim prej orës 13.00.

Ndryshe, ky gjykim po zhvillohet në bazë të aktakuzës së ngritur nga Prokuroria Themelore në Gjilan. Prokuroria pretendon se i akuzuari Srećko Spasić, prej 10 dhjetorit 2015, në cilësinë e Kryetarit të Komunës të Kllokotit, ka keqpërdorur pozitën zyrtare apo autoritetin, në atë mënyrë që me  dashje ka shkelur të drejtën e punëtorëve Bozhidar Dejanoviq dhe Trajan Stojanviq. Sipas prokurorisë, i akuzuari nuk e ka respektuar vendimin e Këshillit të Pavarur Mbikëqyrës të Kosovës, për kthimin në  punë dhe detyrat e punës të dëmtuarve dhe atë si drejtorë të shkollave.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë