38 VJET BURG PËR TË AKUZUARIT PËR RASTIN E NJOHUR TË VRASJES NË RESHTAN

Raporton: Lutfi MORINA

Prizren – Në Gjykatën Themelore në Prizren, të hënën, janë shpallur fajtorë të akuzuarit Fadil Shala, Enver kryeziu dhe artan kryeziu, të cilët akuzoheshin për vrasjen e Burim Kryeziut, gjatë një përleshjeje familjare.

Kryetari i trupi gjykues, Skender Çoçaj, ka shpallur aktgjykimin, me të cilin, të pandehurit i ka gjetur fajtor për veprën penale të vrasjes së rëndë dhe i ka dënuar me dënim total prej 38 vitesh, Fadil Shalën e ka dënuar me 14 vite burgim, ndërsa Enver dhe Artan Kryeziun i ka dënuar me nga 12 vite burgim, për secilin, në këtë dënim do të llogaritet edhe koha e kaluar në paraburgim nga të dënuarit dhe ka vendosur që për të njëjtit të vazhdohet paraburgimi derisa ky aktgjykim të bëhet i plotfuqishëm.

Në Gusht të vitit 2012, kishte ndodhur një rrahje në mes Nuhi Kryeziut me familje, në njërën anë dhe familjeve të vëllait të tij Jonuz Kryeziut e dhëndrit Izet Shalës, në anën tjetër, në të cilën përleshje kishte mbetur i vdekur djali i Nuhiut, Burim Kryeziu.

Për këtë vrasje, Gjykata Themelore në Prizren, në vitin 2014, i kishte gjetur fajtor të akuzuarit, andaj Fadil Shalën e kishte dënuar me burgim në kohëzgjatje prej 15 vitesh, ndërsa, Enver dhe Artan Kryeziun i kishte dënuar me burgim në kohëzgjatje prej 13 vitesh, për secilin.

Gjykata e Apelit, me aktvendim të datës 25.02.2015, e ka prishur vendimin e shkallës së parë, duke e kthyer në ri-gjykim, me arsye se nuk është vërtetuar saktë gjendja faktike, dhe ka rekomanduar që në rigjykim të caktohet trup i ri gjykues dhe të bëhet super-ekspertizë me të cilën do të përcaktohet se cila goditje ka qenë vdekjeprurëse për të ndjerin.

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë